LA PAZ, BOLIVIA, AFP.- Un grupo di investigashon organisá pa Komishon Interamerikano di Derechi Humano a revelá djamars ku durante e konvulshon sosial na fin di 2019 na Bolivia, forsanan militar i polisial a kometé masakrenan i tambe “ehekushonnan” kontra sivilnan.
Grupo Interdisiplinario di Ekspertonan Independiente (GIEI) a investigá e insidentenan i a entrega e informe na presidente Luis Arce na La Paz. E investigashon a inkluí e periodo ku gobièrnu iskierdista di Evo Morales a baha te na komienso di su susesor, senador derechista Jeanine Añez.
Patricia Tappata, integrante di GIEI a bisa ku “por lo ménos 37 persona a pèrdè nan bida den diferente parti di e pais i sentenáres a sufri leshonnan físiko i sikológiko”.
Arce a bisa ku e informe ta relatá “violashonnan grave di derechi humano, masakre i ehekushonnan ekstrahudisial durante e gòlpi di Estado” kontra su mentor polítiko Evo Morales.
A enkarselá Añez desde mart último, miéntras fiskal ta investigá loke a sosodé durante su gobernashon di novèmber 2019 te novèmber 2020.
E gobernador opositor di region di Santa Cruz, Luis Fernando Camacho a bisa ku si “Jeanine Añez ta enkarselá, Evo Morales tambe mester wòrdu investigá”.
