MADRID, AP.- Kasi 40 inmigrante afrikano a bula waya na frontera den e siudat spañó di Melilla i a drenta ilegalmente riba suela spañó. Gobièrnu a bisa ku e migrantenan a drenta for di Maroko.
E bosero di gobièrnu lokal, Irene Flores a bisa ku un grupo di 150 inmigrante a purba subi e waya djasabra mardugá. El a bisa ku polisnan marokano a intervení i a evitá ku mayoria a krusa i pasa pa terenonan spañó. El a indiká ku no tabatin herido entre esnan ku a drenta.
E migrantenan, alegre, a wòrdu hiba pa un Sentro di Estansia Temporal di Inmigrante (CETI) den sentro di e siudat. Nan lo keda einan te ora ku nan wòrdu prosesá pa outoridatnan spañó. Míles di inmigrante afrikano ta biba ilegalmente na maroko, sperando e momentu pa drenta den kualke siudat spañó na nort di Afrika kual ta Melilla òf Ceuta.
