WASHINGTON, AP.- Republikanonan i demókratanan tin planiá di hasi inmigrashon ilegal un di e temanan sentral den elekshon di mitar término di novèmber. E republikanonan ta impulsando un proyekto di lei simbóliko den kámara di representante, kual ta resaltá e labor di Servisio di Inmigrashon i Kontrol di Duana, un organismo ku algun sektor liberal kier abolí.
E medida no ta vinkulante i no ta kambia ningun lei, pero ta buska un proposishon demókrata ku ta kontemplá e eliminashon di ICE, e servisio enkargá ku deportashonnan. E inisiativa republikano, aprobá djárason, ta bisa ku e esfuersonan pa eliminá ICE lo permití pa “delinkuentenan estranhero peligroso” permanesé den e pais i ta un “insulto” pa e agentenan di e dependensia aki.
E republikanonan ta desidido pa saka mas probecho posibel di e proposishon demókrata di abolí ICE.
E demókratanan ta afirmá ku e republikanonan ta purbando di distraé e votadónan, pa nan no focus riba Donald Trump, su polítika di separá muchanan di nan mayornan si nan ta den e pais ilegalmente i riba su deklarashonnan kuestioná den informenan ku Rusia a interferí den elekshon di 2016, kaminda Trump a gana Hillary Clinton.
