WILLEMSTAD.- Luna di yüli ta yegando su mitar i na e momentu aki studiantenan di den region mester ta atendiendo e último detayenan, pero kabes trankil ku e parti finansiamentu ta kla. Sinembargo esei no ta e kaso pa e studiantenan. Pasobra ta reina un insertidumbre grandi si SSC lo haña e suma total di 4 mion pa por finansiá e kasi 130 studiantenan ku lo bai den region. Direktor di SSC sra. Margit de Freitas a splika EXTRA ku te ainda SSC tin 2.2 mion i falta 2 mion pa kaba di kompletá e 4 mion pa region. Siman pasá SSC a manda karta pa gobièrnu pa sa kon ta para ku e 2 mion.
E studiantenan di kual nan dokumentonan ta kla, lo por bai ku e suma ku tin. Sobrá ku dokumentonan no ta kla, lo tin di warda riba gobièrnu. E studiantenan ku dokumento ta kla t’esnan ku a haña un skol i tin tur loke ku e skol ta pidi pa keda atmití, visa ta kla, papel di bon kondukta etc. por bai. E sobránan ku ainda no ta kla, ora nan keda kla, tin di warda riba e plaka di gobièrnu.
Tabatin un total di 225 aplikashon pa studia den region. Sinembargo tin ku a disidí di no ta bai region dor di falta inklaridat, i a opta pa bai Ulanda. Ta kalkulá ku lo ta 130 studiante ku lo bai den region. De Freitas a sigui splika ku e 2 mion ku tin no ta kubri e 130 studiantenan, e plaka no ta sufisiente.
E situashon aki ta pone e studiantenan ku no ta kla, den situashon di tenshon. Loke no ta di komprondé ta ku gabinete Pisas promé ku a baha, a indiká ku a aserká tur ministerio pa por saka fondo for di nan ministerio pa por yega e suma di 4 mion ku SSC tin mester. Promé ku minister Esprit a baha, a indiká na SSC ku e 4 mion tei.
Gabinete Koeiman promé ku a baha e aña aki a indiká ku tin 1.5 mion florin pa studia den region ora SSC a aserká nan. Pero awor minister Alcalá-Wallé ta bisa ku ta 2.2 mion so tin (1.5 mion di Koeiman i 700 mil florin). Finalmente de Freitas a bisa ku SSC tin speransa ku gobièrnu lo yega na un solushon pa ku e situashon.
