LA PAZ, BOLIVIA, AP.- Por lo ménos 70 polis a resultá heridá den un konfrontashon ku vários sentenar di minero ku ta realisando blokeonan riba kaminda di Bolivia. Asina outoridatnan a informá.
“Un dia promé, tabatin algun sekuestro di polis i tortura kontra 70 efektivo di polis. Tur a resultá heridá i trasladá pa sentronan di atenshon”, asina e minister di Gobièrnu, Carlos Romero a señalá. E insidentenan a tuma lugá na momentu ku polis a purba hasi kaya liber. Mas di 50 minero a keda detené i liberá algun ora despues.
Djaweps mainta, 5.200 minero di diferente koperativa a ekstendé e blokeo di rutanan den su region di e pais. E mineronan a sera kaminda direkshon di La Paz, Cochabamba i Oruro.
“Tin algun persona pegá ku no por sali, no por bolbe i e personanan aki ta manera sekuestrá i nos ta pidi pa laga e personanan aki sali i dialogá ku e sektor”, asina e minister a agregá.
E presidente di Konfederashon Nashonal di Koperativanan di Bolivia, Albino Garcia, a indiká ku e mineronan ta rechasá un lei resientemente promulgá tokante koperativanan ku ta permití e trahadónan aki pa sindikalisá.
Pero segun minister Romero, e mineronan kier modifiká e norma aki pa asina asosiá libremente ku empresanan privá nashonal i transnashonal.
