WILLEMSTAD.- Manera tur aña riba 2 yüli dia di Bandera, Gobièrnu di Kòrsou ta entregá Krus di Mérito. E aña akí ta e di 22 edishon. E periodo pa entregá formulario pa proponé un kandidato ta di 10 di mart pa 11 di aprel 2025.
Si bo ta un persona di 18 aña òf mas, di nashonalidat hulandes i ta biba na Kòrsou, bo por presentá un kandidato. Pa presentá kandidato, mester yena un formulario ku algun dato di bo mes i informashon amplio i balioso di e persona ku bo ta presentá. E informashon di e kandidato mester ta di taip.
Mester yena i entregá e formulario via e wèpsait di krus di mérito.
Subi www.krusdimerito.com, klek riba e opshon proponé un kandidato i klek despues riba postulá bo kandidato, yena e formulario i “upload” tur sobrá dokumentu. Pa mas informashon tuma kontakto ku Sektor di Kultura i Deporte via email; krusdimerito@owcs.gov.cw òf na telefòn 529-7369 òf 562-7369 entre 8’or di mainta pa 5’or di atardi.
Di e forma akí Gobièrnu ta duna rekonosementu na personanan ku a i ta hasi aktividatnan meritorio pa komunidat di Kòrsou. Duna rekonosementu na nos mes hendenan ta un gran aporte na nos patriotismo, e yabi pa logra e Pais Kòrsou ku nos tur ke.
