WILLEMSTAD.- Ayera tardi na Curaçao Festival Center a tuma lugá e inskripshon ofisial di partisipantenan pa e diferente elekshon di embahadornan di Karnaval di Kòrsou 2020.
Fundashon JAG na final dje atardi tabata sumamente kontentu kon henter e inskripshon a bai.
Na un manera kreativo i karnavalesko kandidatonan pa Reina, Prens i Pancho hubenil, Rei i Reina Tiner, Reina, Prens i Pancho adulto a ofisialisá nan partisipashon na e elekshonnan ku lo tuma lugá riba e dianan 24, 25 i 26 di yanüari 2020.
Tambe prensa tabatin e oportunidat pa sera konosí ku nos tumberonan di futuro kendenan ta bai partisipá dia 18 di yanüari 2020 na e di 40 edishon festival di tumba Hubenil.
Tabata un atardi yen di sorpresa agradabel karnavalesko i di hopi alegria bou di e partisipantenan.
INSKRIPSHON
Pa Elekshon Hubenil a inskribí 10 kandidata pa Reina i 6 duo pa Prens i Pancho. Pa elekshon di Rei i Reina Tiner a inskribí 8 duo. Pa elekshon di Reina, Prens i Pancho adulto a inskribí 8 kandidata pa Reina i 6 duo pa Prens i Pancho.
Pa festival di tumba hubenil 23 hóben a inskribí. Despues di un oudishon 12 hóben a pasa pa e final ku lo tuma lugá dia 18 yanüari 2020.
Fundashon JAG ta mira bèk riba un atardi di inskripshon eksitoso i manera e ta mustra, kompetensia lo ta fuertísimo pa loke ta trata konkista di e koronanan pa enkabesá e di 50 edishon Karnaval Kòrsou.
