Willemstad – HNO a tuma nota di publikashonnan den sentido ku e seguridat di pashèntnan no ta garantisá si e hospital nobo habri dia 15 di novèmber awor.
Pa Hospital Nobo Otrobanda semper seguridat di e pashènt ta na promé lugá. A ripití esei na diferente okashon konsiderando ku e rekurso mas importante di e hospital nobo ta e kliente.
For di inisio di e proyekto a determiná ku si Inspektor di Salubridat, e outoridat máksimo riba e tereno aki di Pais Kòrsou, establesé ku no por garantisá seguridat di e pashènt, simplemente e instituto no por habri. Te ainda Inspektor di Salubridat no a duna su punto di bista riba e parti aki awor ku nos a yega fin di òktober. Miéntras ku no tin un opinion fiho di Inspekshon di Salubridat no tin ningun instansia ku por bisa si e hospital nobo lo habri si òf no otro luna.
For di basta dia tin deliberashon frekuente ku Inspekshon di Salubridat. Den e kontaktonan aki ta evaluá e proseso paso a paso i ku e diligensia nesesario pa wak di serka kon e proseso ta kanando. E desishon final pues ta den man di Inspekshon di Salubridat.
Pa HNO e fecha di 15 di novèmber semper tabata un fecha ku ta fiha ariba pa yega na apertura di nos hospital nobo pero finalmente ta e kriterio si pashèntnan lo ta risibí den un ambiente ku ta garantisá nan seguridat ta determinante.
Hospital Nobo Otrobanda lo sigui informá komunidat riba e desaroyonan importante ku ta na kaminda den e próksimo dianan.
