MEDELLÍN – Outoridatnan kolombiano a detené Eldrich Boedhoe na Medellín, un siudadano hulandes ku tabata buská internashonalmente via un Notifikashon Kòrá di Interpol. E tin un kastigu definitivo di 12 aña di prizòn na Hulanda pa trafikashon di droga. Boedhoe a ser detené despues di un investigashon Polisial Nashonal di Colombia, via DIJIN i Interpol, den kooperashon ku outoridatnan internashonal.
Un Notifikashon Kòrá di Interpol ta un petishon internashonal pa outoridatnan polisial den diferente pais lokalisá un persona ku ta buská i deten’é provisionalmente, pendiente di un prosedura di ekstradishon òf entrega na e pais ku ta busk’é. E notifikashon mes no ta un órden internashonal di aresto. Kada pais ta disidí, di akuerdo ku su propio lei, kiko ta e pasonan ku mester tuma ora nan lokalisá e persona buská.
Den kaso di Eldrich Boedhoe, e notifikashon tabata permití outoridatnan kolombiano identifik’é komo un persona buská internashonalmente pa Hulanda. Despues di su detenshon, e proseso legal mester sigui pa determiná su entrega na outoridatnan hulandes.
Segun informashon di outoridatnan kolombiano, Boedhoe tabata konsiderá un di e personanan ku tabata koordiná un organisashon transnashonal ku tabata manda kokaina for di Colombia pa Europa, prinsipalmente Hulanda, Fransia i Spaña.
Investigadónan ta indiká ku e organisashon tabata hasi uso di persona ku tabata biaha riba buelonan komersial ku droga skondí den maleta ku kompartimento nan falsu.
E kaso ku a resultá den Boedhoe su kastigu na Hulanda ta bai bèk pa por lo ménos te 2012. Segun informashon publiká na Colombia, Boedhoe i otro miembro di e organisashon tabata envolví den importashon di vários kilo di kokaina for di Colombia pa Amsterdam.
Boedhoe supuestamente a bai biba na Colombia na 2015. Durante añanan ku el a permanesé den e pais, investigadónan ta indiká ku el a logra establesé kontakto ku organisashonnan lokal envolví den trafikashon di droga i tabata koordiná parti di e logístika pa manda kokaina pa Europa.
Investigashon finalmente a logra lokalisá Boedhoe na Medellín. Un di e reporteronan lokal ta indiká ku e tabata biba den bario Doce de Octubre i ku outoridatnan a logra determiná ku e tabata move prinsipalmente riba motosaikel.
Despues di sigui su moveshonnan, investigadónan a lokalisá Boedhoe den sektor di Laureles, kaminda nan a deten’é den un lugá públiko. E operashon tabatin kooperashon internashonal. Ademas di outoridatnan kolombiano, servisio di seguridat di Fransia i U.S. Marshals Service di Merka a partisipá den e investigashon.
Despues di su detenshon, Boedhoe a ser poné na disposishon di Direkshon di Asuntunan Internashonal di Fiskalia kolombiano. Awor outoridatnan lo sigui ku e prosedura nesesario pa Boedhoe por ser entregá na Hulanda, kaminda e tin e kastigu di 12 aña di prizòn ku ta ward’é.
(Foto El Tiempo)
