PORT-AU-PRINCE, HAITI, AFP.- Por lo ménos 42 persona a muri i 11 ta pèrdí na Haiti despues ku áwaseru a kousa inundashon i desplasamentu di tera den wikènt, segun indikashon di ofisialnan di protekshon sivil djaluna.
Mal tempu a afektá shete di e 10 departamentonan den e pais ku ta pasando den un krísis humanitario prolongá, kousá pa violensia di gèngnan, krísis polítiko i stankamentu ekonómiko.
Segun Nashonnan Uní, e áwaseru severo a afektá 37.000 persona i a desplasá 13.400.
E bario di Leogane, ku ta keda 40 kilometer na sùitwèst di e kapital, Port-au-Prince, tabata un di e sitionan di mas afektá, ku daño kousá pa tres riu ku a inundá.
Por lo ménos 20 persona a muri einan, segun ofisialnan haitiano.
“E residentenan ta desesperá. Nan a pèrdè tur kos. E áwaseru a destruí nan teranan di krio, i laba nan bestianan bai kuné”, asina Alkalde di Leogane, Ernson Henry, a bisa na AFP.
Míles di famia a wòrdu afektá den e bario, asina el a bisa, enfatisando ku e poblashon mester di kuminda, awa di bebe i medisina urgentemente.
