…Un ‘tractor’ ta transportá algun hende despues dje tormenta fuerte ku a bati Bahía Blanca, 600 km zùit di Buenos Aires…
BAHIA BLANCA, Argentina.- Por lo ménos 16 persona a muri i mas ku 1.400 a keda evakuá relashoná ku e mal tempu ku a bati e siudat portuario argentino di Bahia Blanca djabièrnè. E alkalde dje siudat, Federico Susbielles, a bisa ayera ku e inundashon a kousa dañonan pa mas di 400 mion dòler.
Ministerio di Seguridat dje provinsia di Buenos Aires, kaminda Bahia Blanca ta ubiká, a informá den un komunikado di a risibí mas ku 100 denunsia di personanan ku a pèrdè den e siudat ku ta konta ku un dje prinsipal hafnan di e pais. Tambe a señalá ku 1.450 famia mester a bandoná nan kas.
Te ku ayera nochi a konfirmá desaparishon di dos mucha muhé ku a keda lastrá pa awa. Mama dje muchanan a purba na trasladá su yunan, di 1 i 5 aña, for di un outo pa un trùk, na momento ku diripiente awa a krese i lastra nan bai kuné.
E mama por a sali for dje awa na 1.200 meter mas leu pero te ku ayera nochi e yunan si tabata pèrdí. Gran parti di esnan ku a pèrdè nan bida ta hendenan di edat.
Ayera a hasi un evaluashon dje daño i a yega na konklushon ku rekonstrukshon dje siudat lo kosta den kareda di 400.000 mion peso (m.o.m. US$ 400 mion).
