WILLEMSTAD – Den oranan di mainta di djabièrnè 4 di sèptèmber 2020, e tim di Kuerpo Polisial Kòrsou ku ta enkargá ku investigashonnan finansiero i di labamentu di plaka a tene sinku (5) entrada hudisial den kuadro di un investigashon ku ta hiba e nòmber Girasole.

E investigashon Girasole aki ta dirigí su mes riba falsifikashon di dokumento, malversashon di supsidio i labamentu di plaka.

Den kuadro di e investigashon aki a tene entradanan hudisial na 5 adrès aki na Kòrsou.

Na Van Engelen a detené e dama L.P.G.C. di 48 aña di edat i e hòmber C.E.C. di 55 aña di edat, ámbos nase na Kòrsou.

Na un kas den Kwartier, a detené e hòmber A.S.V.I. di 54 aña di edat, tambe nase na Kòrsou.

Na un adrès na Sunset Heights a detené e dama C.O.G. di 45 aña di edat nase na Kòrsou.

Mas leu a tene un entrada hudisial na Banko di Seguro Sosial i un fundashon ku ta risibí supsidio di gobièrnu.

Relashoná ku e investigashon aki, e tim a konfiská kuater (4) outo luhoso, sèn kèsh i dokumentunan ku ta di importansia pa e investigashon.

A presentá e sospechosonan dilanti di un fiskal ouksiliar ku a ordená nan enkarselamentu, pendiente di mas investigashon.

No ta ekskluí posibilidat, ku durante di próksimo dianan mas detenshon lo por keda realisá.

LAGA UN KOMENTARIO

Please enter your comment!
Please enter your name here