LONDON, AP.- Djamars polis britániko a detené un profeshonal di salú, bou di sospecho di asesiná ocho beibi i purba mata seis mas den un hospital na nortwèst di Inglatera.
Polisnan a kuminsá investigá e morto di algun beibi den e hospital Countess òf Chester, mas di un aña pasá. Esaki a start despues di a registrá un tasa di morto di beibi muchu mas haltu di loke a wòrdu premirá i kual no tabatin splikashon p’e. E mortonan a tuma lugá spesialmente den e unidat ku ta atendé ku beibinan prematuro òf beibinan ku mester di kuido spesial.
E hospital a pidi polis pa “deskartá motibunan di morto no natural”.
E investigashon inisial a konsentrá riba e morto di ocho beibi. Polis a bisa djamars, ku awor ta investigando e morto di 17 beibi i 15 kaso no fatal den e unidat. E investigashonnan ta kubri e periodo di mart 2015 i yüli 2016.
Polis di Cheshire a bisa ku un “profeshonal di salú” a wòrdu arestá djamars bou di sospecho di asesinato i intento di asesinato. E muhé no a wòrdu identifiká i ningun detaye riba su funshon a wòrdu suministrá.
