JERUZALEM (AFP).- Ministerio Públiko israelí a habri un investigashon penal kontra di Sara Netanyahu, kasá di e promé minister israelí Benjamin Netanyahu.
“A start un investigashon penal” riba sospecho di delitonan, segun ministerio públiko den un karta na un diputado. No a splika e naturalesa dje investgashon kontra di Sara Netanyahu, ku aktualmente ta na Merka.
E parlamentario di partido demokrat, Naama Lazimi, a akus’é di a preshoná testigunan den un kaso di korupshon di su kasá.
“E notifikashon akí ta importante pa e kontròl parlamentario, e sistema hudisial i e estado di derecho”, segun Lazimi, un èks-militante di Partido Laborista.
”Lo mi no keda ketu, lo mi no entregá i lo no permití pa nan dera e asuntu aki. Lo hasi hustisia, nos lo vigilá pa esaki tuma lugá”, segun el agregá.
Den e programa di investigashon, a akusá e kasa di Netanyahu di a purba na intimidá un testigu den un kaso kontra di su kasá.
Den e episodio, ta skucha supuesto grabashon di Sara Netanyahu pidiendo e ayudante di su kasá, kende despues a muri, pa esaki hasi un kampaña negativo riba retnan sosial kontra opositornan di su kasá, spesialmente kontra Hadas Klein, un dje testigunan klave den e proseso kontra dje promé minister israelí.
Den desèmber e hefe di gobièrnu a komparesé pa promé biaha durante e proseso pa korupshon. El a referí na e akusashonnan komo “kosnan ridíkulo” .
E kaso a start den mei di aña 2020 pero a keda interumpí pa e guera den Gaza.
E promé minister na vários okashon a pidi pa aplasá e oudiensia pa motibu dje konflikto. Netanyahu ta e promé hefe di gobièrnu israelí den ehersisio ku ta enfrentá un proseso penal. E ta keda akusá di soborno, froude i abusu di konfiansa.
