Den kuadro di pakete di pais
WILLEMSTAD.- Indeksashon outomátiko di penshun di behes (aov), suèldu mínimo i i ònderstant konforme e oumento di kosto di bida ta un di e rekomendashonnan ku ta bini dilanti den e estudio ku a hasi for di 2023 den kuadro di e reformanan di merkado laboral i seguridat sosial manera menshoná den pakete di pais.
Mester ankra e indeksashon outomátiko akí den lei inkluso un klóusula pa sirkunstansianan ekstraordinario kaminda e minister di forma motivá por disidí pa no indeksá e pagonan aki. E indeksashon di aov, suèldu mínimo i ònderstant tambe ta forma parti di e pensamentu ku mester eradiká pobresa. Debí ku no ta indeksá e sumanan aki e forsa di kompra di esnan ku ta kobra un di e seguronan sosial akí ta baha ku tempu poniendo ku nan ta kai mas i mas den pobresa.
Ta konsehá tambe pa traha riba un maneho di volúmen ku e meta pa kontrolá e kantidat di hende ku ta kobra ònderstant i stimulá esnan ku ta kobra ònderstant pa nan drenta den e proseso laboral. Pa logra un maneho di volúmen efektivo ta imperativo ku tin un ofisina di labor ku ta funshoná di forma óptimo i den kolaborashon ku e instansia responsabel pa paga ònderstant. Si ehekutá e maneho aki bon e kantidat di hende ku ta kobra ònderstant mester baha ku tempu.
Tambe ta rekomendá pa amplia e posibilidatnan pa un persona traha banda di e ònderstant ku ta risibí. Por ehèmpel ta hasi posibel ku por haña un entrada te na nivel di suèldu mínimo sin ku ta kòrta den e ònderstant. Esaki lo stimulá e kobradónan di ònderstant pa ofresé nan labor riba merkado i tambe lo krea un situashon kaminda mas kobradó di ònderstant ku un trabou ta drenta merkado laboral i no mester dependé mas di un ònderstant.
Pa por ehekutá e reformanan aki e sektor di Desaroyo Sosial di Ministerio di SOAW mester pasa den un trayekto di outomatisashon. Sin un organisashon di ehekushon ku ta funshoná efektivo i efisiente no ta oportuno ehekutá e reformanan. Bou di sirkunstansia aktual no ta posibel ehekutá e tareanan legal i maneho di forma adekuá.
Si no drecha e manera di funshoná di e sektor e mesun kos lo konta pa tareanan i maneho nobo ku implementá. E ònderstant ku ta paga aktual na personanan ku no tin un trabou no ta sufisiente pa nan por kubri nan gastunan. E idea ta ku ta subi e ònderstant gradualmente te ora e yega 70 porshento di suèldu mínimo.
Riba término kòrtiku mester subi e ònderstant te na 30 porshento pa soltero i 52 porshento di e suèldu mínimo pa pareha kasá. Apesar ku un subida di e ònderstant lo nifiká ku esnan desempleá ta sinti ménos nesesidat pa buska un trabou òf traha banda di e ònderstant ku ta risibí, e meta prinsipal ku ke logra ku e oumento ta eliminashon di pobresa.
