Barkunan ankrá na Oman serka di Hormuz
TEHRAN, IRAN, AFP.- Iran i Oman a bai di akuerdo ku un ruta pa barkunan ku ta pasa den estrecho di Hormuz. Nan ta finalisando detayenan di e plan i huntu nan lo manehá e ruta nobo, segun indikashon di e Ministerio di Eksterior di Tehran.
E bosero, Esmail Baqai, a bisa ku a determiná kiko e ruta lo bira. El a añadí ku e dos paisnan ta trahando riba un “deklarashon konhunto” i nan ta spera ku niun otro pais no ta interferí ku e proseso.
Iran a tuma kontròl di Estrecho di Hormuz. E ruta ta unu stratégiko pa transportá petroli rònt mundu, desde ku Merka i Israel a lansa nan guera kontra Iran riba 28 di febrüari.
Presidente merikano, Donald Trump, a insistí na vários okashon ku Iran ke yega na un akuerdo pa habri e ruta. Pero e pais ta nenga esaki.
Promé ku e guera a kuminsá fin di febrüari, alrededor di 20% di tur eksportashon mundial di petroli i GNL tabata pasa den e estrecho.
