E minister di Eksterior di Iran, Abbas Araghchi (drechi), huntu ku e minister di Interior Mohsin Naqvi
Tehran, IRAN, AFP.- Funshonarionan di Iran i Merka a bisa djabièrnè ku ta yegando na un akuerdo pa pone fin na e guera den Medio Oriente. Pakistan, kual ta e mediadó, a ekspresá su optimismo i a afirmá ku pronto e paisnan lo yega na un akuerdo.
Despues di vários siman di negosiashonnan hopi slou, marká pa vários menasa i konfrontashonnan apesar di un tregua den aprel, e presidente merikano, Donald Trump, a bisa ku ta serka di firma un akuerdo. Pero ainda e kòmbersashonnan ta kontinuando.
Ademas, tin vários desakuerdo entre ámbos parti. Medionan estatal iraní a publiká informashon ku e posibel akuerdo no ta kuadra ku e vershon di Washington.
E minister di Eksterior di Iran, Abbas Araghchi, a splika algun punto di e akuerdo den un entrevista ku e televishon estatal. El a bisa ku e akuerdo ta inkluí fin di blokeo merikano den hafnan iraní i kambionan den e atministrashon di estrecho di Hormuz. Estrecho di Hormuz ta un ruta marítimo importante pa transporte di petroli i gas. E promé minister di Pakistan, Shehbaz Sharif, kual su pais tabata un mediadó importante desde komienso di e kòmbersashonnan, a konfirmá ku ya tin un akuerdo final. Un funshonario merikano a ekspresá optimismo i a bisa ku e partinan por firma e akuerdo den e próksimo dianan.
