TEHRAN, IRAN.- E presidente di parlamento di Iran a akusá Merka di plania un atake, apesar ku e pais ta promoviendo un akuerdo ku a negoshá. Un barku di guera merikano a yega Medio Oriente ku kasi 3.500 efektivo militar.
Mohammad Bagher Ghalibaf su akusashonnan a yega despues di mas ku un luna di bombardeonan aéreo di parti di forsanan merikano i israelí.
E guera a eskalá despues ku Iran a reakshoná ku atakenan kontra estadonan di e Golfo i e ruta marítimo di estrecho di Hormuz. Esaki a pone e ekonomia mundial na peliger.
“E enemigu ta manda mensahenan di negosiashon i diálogo miéntras ku nan ta planiando un atake den sekreto”, asina Ghalibaf a bisa den un deklarashon.
“Nos sòldatnan ta wardando riba yegada di sòldatnan merikano pa sende nan na kandela i kastigá nan aliadonan regional”, asina el a añadí.
Ghalibaf a pidi pa tur iraní uni, bisando ku e guera ta “den su estado mas krítiko”.
Presidente merikano Donald Trump a papia vários biaha di kontaktonan diplomátiko ku Iran, aunke Tehran ta ninga ku esaki ta bèrdat.
