Sostenedónan dje partido Jamaar-e-Islami ta karga un poster ku ta bisa “Kita man for di Iran”,ademas di un ‘banner’ ku potrèt di kabesante dje partido Hafiz Naeem Ur Rehman (d) miéntras ku nan ta kondená atakenan norteamerikano i israelí.
TEHERAN, Iran (AFP).- Iran a anunsiá di a lansa misilnan kontra e basenan norteamerikano di Al Udeid den Qatar, esun di mas grandi di Merka den Medio Oriente, komo reakshon riba bombardeonan kontra instalashonnan nuklear iraní. Doha a afirmá di a interseptá e proyektilnan.
Teheran, involukrá pa kasi dos siman den un guera ku Israel, a kumpli ku su menasa di respondé e bombardeonan norteamerikano.
Teheran a afirmá di a lansa seis misil kontra e base norteamerikano, e mesun kantidat ku “e kantidat di bòm ku Merka a usa pa ataká e instalashonnan nuklear iraní”.
“E akshon no ta suponé di ta ningun menasa pa nos pais amigu i ruman, Qatar”, segun nan a bisa.
Ministerio qatarí di Defensa a bisa ku “a interseptá ku éksito” e atake, presisando ku esaki no a laga víktimanan i ku Qatar “ta reservá e derechi pa respondé e agreshon flagrante”.
Segun outoridatnan qatarí, e base ataká a keda evakuá promé ku e bombardeo.
Djadumingu, Ali Akbar Velayati, un asesor dje guia supremo iraní, e ayatola Ali Jamenei, a menasá na ataká e basenan militar norteamerikano den e region.
Despues dje atake kontra di Qatar, Kuwait i Barein a anunsiá di ta sera nan espasio aéreo, loke a pone ku preis di petroli a kai.
BOMBARDEO ISRAELI RIBA TEHERAN
Di su parti, Israel djaluna anochi a hasi un yamada riba abitantenan di Teheeran pa mantené nan mes alehá di basenan militar, atvertiendo ku lo e sigui ku su bombardeonan.
Atakenan israelí a alkansá sentronan di mando di Guardiannan di Revolushon, e ehérsito ideológiko di Iran i e prizòn di Evin, kaminda a registrá dañonan. Den e prizòn ei nan ta sera prezunan polítiko, opositornan i algun detenido oksidental.
For di 13 di yüni, Israel, ku ta bisa ku Iran ta na punto di fabriká un bòm atómiko, a ataká algun shen base militar i instalashonnan nuklear i a mata funshonarionan haltu i sientífikonan.
E guera a okashoná mas ku 400 morto i 3.000 herido den Iran, e mayoria di nan ta sivilnan. Di su parti, e atake iraní kontra di Israel a mata 24 persona, segun outoridatnan israelí.
