TEHERAN, Iran (AFP).- Dos hòmber a keda ehekutá ayera na Iran pa nan partisipashon den e manifestashonnan kontra di gobiernu den luna di yanüari, di akuerdo ku e agensia Mizan, órgano dje poder hudisial. Ali Hemmati i Majid Nik-Andish a keda deklará kulpabel di “a partisipá den disturbionan den yanüari ku a provoká morto di kuater miembro di forsanan di seguridat iraní” den e siudat di Mashdad.
E dos hòmbernan , ku “a keda akusá pa dañonan grave na propiedatnan públiko sendiendo kandela na entre otro bankonan i bùsnan”, a keda horká ayera mainta, despues di konfirmashon di nan sentensia di parti di Korte Supremo.
Na fin di desèmber, un movementu di protesta ku na un prinsipio tabata reklamá kosto haltu di bida a transformá hopi lihé i a bira un manifestashon kontra di gobièrnu. Gobièrnu a referí na mas ku 3.000 morto na e okashon ei, referiendo na violensia pa “aktonan terorista” orkestrá pa Israel i Merka.
Organisashonnan di derechinan humano den ekstranhero a papia di un represhon ku a kousa míles di morto. Presidente merikano Donald Trump na e okashon ei a menasá ku intervenshon di militarnan den Iran promé di a lansa -dia 28 di febrüari huntu ku Israel- un atake kontra e pais i ku tabata e inisio di un guera den Medio Oriente.
Segun vários organisashon di derechinan humano, entre nan Amnistía Internashonal, Irán ta e pais ku mas ta apliká pena di morto despues di China.
