Partisipashon na protesta na Iran por tin su konsekuensia hopi grave, manera ta e kaso dje señora riba e potrèt akí.
PARIS, Fransia (AFP).- Dos hende muhé akusá di a partisipá na protestanan anti gobièrnu den luna di yanüari último a keda sentensiá na kastigu di morto na Iran, segun a keda informá a gruponan di derechinan humano. Tur dos a keda kondená den kasonan separá pero relashoná ku insidentenan den Isfahan, un siudat den sentro dje pais ku tabata e foko di protestanan ku a tuma lugá na nivel nashonal i ku a alkansá su punto mas fuerte den anochinan di 8 i 9 di yanüari.
Den konteksto dje guera ku Merka, Iran a ehekutá 29 hende hòmber relashoná ku e protestanan. Te ku e momentu akí ningun hende muhé a keda ehekutá pa e protestanan, aunke ku Iran a horka sigur 16 muhé e aña’kí pa otro akusashonnan.
Taraneh Rahimi, di 20 aña, a keda kondená na morto huntu ku nuebe hòmber pa insidentenan ku a tuma lugá riba un plasa di Isfahan durante e protestanan, durante kua dos persona a pèrdè nan bida, entre nan un miembro di forsanan di seguridat.
Otro akusadonan den e kaso akí a keda kondená na te hasta 36 aña di prizòn, inkluso ruman muhé di Taraneh, Romina.
“Abogadonan dje akusadonan no tabatin akseso na un parti importante di loke a pone riba papel kontra di nan i a reklamá ku no a duna nan sufisiente tempu pa revisá dokumento i e pruebanan”, segun un informe ta indiká.
Di su parti, Leila Abolhasani, un muhé di 43 aña kende tin dos yu, a keda kondená pa un tribunal di Isfahan pa motibu di a sende kandela durante e protestanan. Su famia ta nenga e akusashon i a bisa ku e tabata na sitio filmando i entre otro e filma e edifisio na kandela. Pero a akus’é i konden’é pa e akusashon di “hiba guera kontra di Dios”, ku ta un delito kapital. A manda e kaso Tribunal Supremo pa su revishon.
