Entiero di algun dje víktimanan ku a pèrdè nan bida den e atake di Merka i Israel riba Iran.
TEHERAN, Iran (AFP).- Outoridatnan religioso di Iran ayera a designá Mojtaba Jamenei, yu dje defuntu Ali Jamenei, komo lider supremo nobo dje pais, desafiando e menasanan di Merka i Israel di oponé na su nombramentu. Nuebe dia despues ku e atakenan di Israel i Merka a mata e ayatola Jamenei i a hinka Medio Oriente den un guera, e Asamblea di Ekspertonan dje gobièrnu religioso a reuní pa eligí su próksimo lider.
Mojtaba Jamenei, di 56 aña, “a keda nombrá i presentá komo e di tres guia dje sistema sagrado di Repúblika Islamika di Iran, basá riba e sistema di un voto desisivo di e miembronan respetá di Asamblea di Ekspertonan”, segun e órgano religioso a bisa den un komunikado.
E asamblea “no a duda ni un minüt” pa eligí un lider nobo, apesar dje “brutal agreshon dje kriminal di Merka i e malbado régimen zionista”. E presidente norteamerikano, Donald Trump, anteriormente a balotá Jamenei kalifikando esaki komo “un peso lihé”.
E republikano no mas ku ayera a bolbe insistí ku e mester tin bos den nombramentu dje lider nobo di Iran. “Si e no haña nos aprobashon lo e no dura muchu”, segun Trump a deklará na ABC News promé ku a hasi e anunsio. Pero e kansier iraní a deklará ayera ku e desishon ta korespondé únikamente na Iran i a agregá ku “lo no permití pa ningun henter interferí den nos asuntunan interno”.
Den e programa “Meet the Press” di ABC, e minister di eksterior di Iran, Abás Araqchi, a eksigí pa Trump “pidi despensa na e pueblonan dje region” pa motibu di a start e guera.
Segun e último balansa di Ministerio iraní di Salú, mas ku 1.200 persona a muri i mas ku 10.000 sivil a resultá heridá den e atakenan di Merka i Israel riba Iran.
