Riba e potrèt por haña un bista di presidente iraní Masoud Pezeshkian durante di un rueda di prensa na kapital di Tehran.
TEHRAN, IRAN, AFP.- Iran no tin intenshon di habri Estrecho di Ormuz bèk te ora ku Merka aseptá “tur” su kondishonnan. Guardianan di Revolushon di Iran a laga esaki kla djadumingu, miéntras e estrecho stratégiko ta sigui den sentro di e konflikto ku Washington.
Estrecho di Ormuz ta un di e rutanan marítimo mas importante pa transporte mundial di petroli. E blokeo i atakenan kontra barkunan ku ta pasa den e área ya a provoká un kaida konsiderabel den tráfiko marítimo i un subida den preis di petroli.
IRAN TA PIDI FIN DI SANKSHONNAN
Pa habri e estrecho atrobe, Tehran ta pone diferente kondishon. Iran ta eksigí pa Merka pone fin na e agreshon kontra Iran i su aliadonan, kita e blokeo di su hafnan, eliminá sanshonnan kontra ekonomia iraní i kita e blokeo riba e aktivonan iraní.
Ademas, Tehran ta eksigí pa Merka “indemnisá Iran kompletamente pa e dañonan kousá” durante e guera.
TRUMP: “NOS TA TUMA E KOS KU KALMA”
Presidente merikano, Donald Trump, den un entrevista ku medio digital Axios, a minimalisá e eksigensianan di Tehran. “Nos ta tuma esaki ku kalma”, Trump a bisa, agregando ku segun e “tur kos lo bai bon”.
Trump a deklará ku Washington ta negoshá solamente parsialmente ku Iran i ku Merka ta sigui opservá situashon ekonómiko di e pais.
Segun Trump, Iran ta konfrontando inflashon haltu i problema finansiero ku por yega te na pone preshon riba pago di su tropanan.
ORMUZ A BIRA “SENARIO DI GUERA”
Estrecho di Ormuz ta den sentro di e diferensianan entre Iran i Merka.
Atakenan kontinuo den e ruta marítimo aki ya a hasi ku un tregua alkansá na aprel a frakasá. Mediadónan ta tratando di logra ku ámbos banda ta bolbe na e kondishonnan di un memorandum firmá na yüni, ku ta kontené un ruta pa kuminsá negosiashonnan di pas.
Minister di Relashonnan Eksterior di Iran, Abás Araqchi, a indiká ku kòmbersashonnan ku Oman tokante tránsito i maneho di Estrecho di Ormuz “ta den nan fase final”.
Oman ta situá na e otro banda di Estrecho di Ormuz. Tehran ke introdusí un tipo di tarifa pa tránsito den e área. Pero Araqchi a enfatisá ku reapertura di e estrecho ta dependé ainda di kumplimentu ku e otro eksigensianan di Iran, inkluso pago di kompensashon dor di Merka.
Minister iraní a nenga ku Tehran i Washington ta negoshá direktamente. Segun el a bisa, e dos paisnan solamente ta “interkambiá mensahe” via intermediarionan.
Guardianan di Revolushon a bai mas leu i a deklará ku nan strategia ta pa mantené Estrecho di Ormuz será “te ora ku e enemigu aseptá tur nos kondishonnan”.
“E estrecho awor ta pa nos un berdadero senario di guera i no simplemente un ruta marítimo”, nan a deklará.
Presidente irani Masoud Pezeshkian
