TEHERAN, AFP.- Iran ta partisipá na Bruselas e siman aki den un enkuentro pa reanudá negosiashonnan riba e akuerdo nuklear di 2015, suspendé for di yüni, asina diputado iraní a anunsiá.
“E minister iraní di relashonnan eksterior Hossein Ami Abdollahian a deklará ku e kombersashonnan ku e grupo 4+1 lo kuminsá djaweps awor na Bruselas”, asina e agensia Fars di diputado Ahmad Alirezabeigui a indiká, despues di un reunion ku porta sera di parlamentu ku hefe di diplomasia.
Ora el a menshoná 4+1, e diputado a referí na kuater miembro permanente di konseho di seguridat di ONY (Fransia, Reino Uni, Rusia, China) i Alemania.
Djabièrnè, e hefe di diplomasia di Union Oropeo Josep Borrell a mustra di ta dispuesto na risibí na Bruselas e dirigentenan iraní den su demanda, despues di un bishita na Teheran di e negoshadó di UE enkargá ku ekspediente nuklear Enrique Mora.
Na aprel nan a reuní na Viena pa re-inisia e negosiashonnan ku representantenan iraní pa un banda i di otro banda Fransia, Reino Uni, Rusia i China i tambe Alemania, den presensia di UE. E paisnan aki ta miembronan di e akuerdo di 2015 di e programa nuklear di Teheran.
