TEHRAN, IRAN, AFP.- Iran i Merka no a ataka otro djadumingu. Esaki ta un alivio pa transporte riba laman den e Golfo i e industria di petroli. E representante di Donald Trump den Nashonnan Uni a bisa ku e presidente ta “dunando espasio pa e negosiashonnan”.
Iran a bisa ku el a stòp ku e atakenan di represaya kontra aliadonan di Merka den Medio Oriente. E embahador di Merka den Nashonnan Uni, Mike Waltz, a bisa na Fox News Sunday ku ounke Trump ta kla pa aktua, e lo duna “algu di espasio na e kombersashonnan”.
Promé ku djabièrnè, ehérsito merikano a ataka Iran durante 13 anochi konsekutivo. Sin embargo, ya dos anochi tras di otro a pasa sin bombardeo.
E atakenan den estrecho di Hormuz a para tur esfuerso diplomátiko entre Washington i Tehran. Despues e konflikto a amplia i a inkluí atakenan kontra barkunan merikano, barkunan den e region i aliadonan den e Golfo.
Promé Minister di Israel, Benjamin Netanyahu lo biaha pa Kas Blanku mañan. E tin intenshon di pidi Trump pa mantené su postura firme kontra Tehran, spesialmente riba su programa nuklear
Iran a insistí durante vários aña ku su programa nuklear ta pa e pueblo. Pero Merka i su aliadonan ta sigurá ku e pais ke desaroyá armanan nuklear.
