PARIS, FRANSIA (AFP).- E koalishon di iskierda Frente Popular nobo (NFP) lo gana elekshonnan parlamentario na Fransia sin mayoria apsoluto, despues di un kompetensia fuerte entre e aliansa di presidente Emmanuel Macroni e ekstremo derecho disputando e di dos puesto, segun proyekshonnan.
NFP lo haña entre 172 i 215 dje 577 asientonan di Asamblea Nashonal, siguí pa e aliansa di gobièrnu ku entre 150 pa 180 i e partido ultraderechista Agrupashon Nashonal (RN) i su aliadonan ku entre 115 i 155, segun proyekshonnan despues ku e urnanan elektoral a sera.
E resultadonan lo ta un derota pa e lider ultraderechista Marine Le Pen, kende a frakasá den su intento pa haña e mayoria apsoluto, loke proyekshonnan te ku siman pasá a duna komo posibilidat. Inkluso a señalá ku e tabatin chèns di gana, manera tabata e kaso te ku dos dia pasá.
“Nos komunidat di forma bon kla a rechasá e esenario di mas pió ku por tin”, segun e lider iskierdista radikal Jean-Luc Melenchon, kende ta di opinion ku NFP -ku no tin e mayoria apsoluto- mester goberná, pero sin entamá negosiashon ku e aliansa di Macron.
E minister di Interior, Gerald Darmanin, kende a logra su reelekshon komo diputado, a respondé ku “ningun hende por bisa ken a gana elekshon” i a hasi un yamada na e partido di gobièrnu pa pone su mes papia ku e partido di derecha Republikanonan (LR), ku a logra entre 57 i 67 asiento.
Marine Le Pen,di su parti, a bisa ku “laman ta subi…e biaha aki e no subi lo sufisiente i, konsekuentemente, nos viktoria solamente a keda aplasá.
Un gobièrnu di su formashon, ku por a dupliká e 89 diputadonan di 2022, lo a bira e promé ultraderechista na Fransia for di despues dje liberashon di Alemania nazi durante e Di Dos Guera Mundial i unu nobo den Union Europeo, huntu ku Italia, entre otro.
Artista-, deportista- , sindikato- i organisashonnan a mobilisá pa para e yegada na poder di ekstremo derechi, manera t’e kaso ku e strea di futbòl Kylian Mbappé, kende a hasi un yamada pa vota “pa e banda korekto”.
For di Italia, papa Francisco a atvertí ayera kontra di “tentashonnan ideológiko i populista”, sin menshoná ningun pais.
