GENEVE (AFP).- Komité Internashonal di Krus Kora a afirmá ku 22 persona a muri ayera den Gaza debí na un bombardeo ku a daña su ofisina, den un zona kaminda tin algun shen hende bibando bou di kondishon pésimo despues di a hui for di nan bario bombardiá pa Israel.
No a presisá ken a dispará e proyektonan di kaliber pisá, pero den un komunikado riba e ret sosial X nan a skirbi ku “e proyektilnan a daña e struktura dje ofisina di Krus Kòrá”. Mas aleu a informá ku 22 persona a muri i e trasladá 45 víktima pa hospital.
Ministerio di Salú di e teritorio palestino goberná pa Hamas, a bisa ku tabatin 25 morto i 50 herido den e atake, pa kua nan a kulpa Israel. E ministerio a bisa ku e bombardeonan israelí a konsentrá riba hendenan ku a hui for dje área di Al-Mawasi.
Un bosero di forsanan di defensa di Israel a bisa ku “un investigashon inisial no a duna indikashon ku nan sòldánan a realisá e atake den e zona humanitario di Al-Mawasi.
CICR a duna di konosé ku “proyektilnan di kaliber pisá a kai na algun meter for dje ofisina i residensia di Komité Internashonal di Krus Kòrá den oranan di djabièrnè atardi. “Pa tira asina serka di strukturanan humanitario, di kua e ubikashon ta konosí pa e partinan den konflikto i ku ta marká ku e símbolo di Krus Kòrá, ta trese den riesgo bida di sivilnan i dje personal di Krus Kòrá”, segun e organisashon ta reklamá.
CICR na vários okashon a hasi yamada desesperá na Israel i Hamas pa nan respetá e derechinan internashonal i pa respetá bida di e trahadónan humanitario i di sivilnan.
