BEIRUT, LIBANON (AFP).- Israel a anunsiá di a e “eliminá” un hefe militar di Hezbolá den un bombardeo ku segun e minister libanes di salú, a laga 12 morto i desena di herido den un bario zùit di Beirut. Ta konsiderá e área komo un sentro di formashon islamita pro iraní.
Avionnan di kombate di Forsa Aéreo di Israel a realisá un atake selektivo den e zona di Beirut, eliminando Ibrahim Aqil, komandante dje unidat Tadwan”, i tambe otro “figuranan di promé plano dje team di operashon di esnan na mando” di Hezbolá, segun un bosero di ehérsito den un komunikado.
E kabesantenan eliminá tabata den un reunion bou di tera den e kurason di un bario residensial”, segun e bosero di ehérsito, Daniel Hagari, agregando ku “mas o ménos 10 komandante a muri einan”.
Merka a yega di ofresé un rekompensa di 7 mion dollar pa informashon riba Aqil, konsiderá un “miembro prinsipal” dje organisashon ku a komandá e atentado kontra di embahada norteamerikano den Beirut den 1983, ku a laga 63 morto.
Ministerio libanes di salú a referí na 12 morto i 66 herido den e bombardeo israelí.
Reporteronan di AFP a indiká ku e atake a laga un krater masha grandi i a destrosá vários piso mas abou di un edifisio haltu den e bario den zùit dje kapital libanes.
“Nos enemigunan no tin lugá pa skonde”, segun e minister israelí di defensa, Yoav Gallant, riba ret sosial X.
