Un bista mas dje destrukshon ku Merka ta kometiendo den Gaza, ku bombardeo tur dia, matando kantidat grandi di palestinonan ku no tin nada di aber ku guera.
SIUDAT DI GAZA (AFP).- Ehersito israelí ayera a atvertí ku den próksimo dianan lo e realisá “un atake sin presedente” den Siudat di Gaza, i a urgi abitantenan pa hui bai direkshon zùit promé ku e ofensiva di tera ku probablemente lo start e wikènt aki. For di djamars último Israel a lansa un atake tantu aéreo komo na tera den Gaza i un biaha mas a bisa ku ta “pa eliminá e movementu islamita Hamas”.
“Forsa di defensa di Israel lo sigui aktua ku tur su forsa kontra di Hamas i otro organisashonnan terorista”, segun e bosero militar israelí Avichay Adraee, E atvertensia di ayera ta tuma lugá dos dia promé ku Asamblea General di Nashonnan Uní na New York, un konferensia den kua vários potensia oksidental manera Fransia i Reino Uni lo anunsiá di ta rekonosé e Estado Palestino. Mientras tantu, Portugal tambe a anunsiá di lo hasi esei.
Defensa Sivil, ku ta operá bou di outoridat di gobièrnu di Hamas, a indiká ayera ku 450.000 persona a hui for di Siudat di Gaza for di kabamentu di ougùstùs. Pero pa hopi hende e biahe ta demasiado karu i pa kolmo nan no sa unda pa bai.
“Nos a pèrdè tur kos, nos bida, nos futuro, nos sensashon di seguridat. Kon mi ta hasi evakuá si ni sikiera por permití mi un sistema di transpòrt”, segun pregunta di un palestino di 35 aña.
Segun balanse entregá pa hospitalnan di Gaza, ayera Israel a bolbe mata 41 palestino, inkluso 11 den Siudat di Gaza. Djarason Israel a anunsiá di lo permití apertura di “un ruta temporal” pa e palestinonan por bai skonde na otro parti di Gaza, pero ku e ruta ei lo a sera ayera’tardi.
Genosidio
Un komishon independiente nombra pa Nashonnan Uni a emití un dokumento den kua ta akusá Israel di ta kometé genosidio den teritorio palestino i a responsabilisá e promé minister Benjamin Netanyahu i otro funshonarionan haltu. Israel a rechasá e akusashon i a bisa ku esaki ta “un gañamentu” riba nan.
Mientras tantu, e kampaña di represaya israelí kontra dje atentado di 7 di òktober di 2023 -ku a kosta bida di 1.219 persona den Israel, ta menshoná e kantidat di 65.174 palestino ku a muri na man di Israel den Gaza, di kua e mayor parti ta sivilnan ku no ke ta parti dje guera.
