HERUSALEM, AP.- E prokurador general di Israèl a akusá promé minister Benjamin Netanyahu ku un serie di akusashon di korupshon. Esaki ta pone permanensia di e lider na peliger.
Despues di un investigashon di tres aña, e prokurador Avichai Mandelblit a akusá Netanyahu ku froude, abusu di konfiansa i soborno na tres okashon.
Mandelbilt a rechasá krítika di opositornan bisando ku e akusashon tin di aber ku polítika. El a agregá ku el a tuma e desishon despues di vários luna di deliberashon.
Segun e akusashon, Netanyahu a haña shampaña i sigaria na balor di míles di dòler di su amigunan multimionario. El a hasi fabor na direktor di un korant i a usa su influensia na fabor di un empresario di telecom pa haña kobertura na su fabor.
E akusashon no ta oblig’e pa renunsia. Netanyahu a rechasá tur akusashon i a akusá prensa, polis i hustisia di realisá un “witch hunt” kontra dje.
E akusashonnan mas grave ta relashoná ku “Causa 4000”, kaminda ta akusá Netanyahu di a aprobá diferente regulashon na pa duna su amigu Shaul Elovitch benefisionan na balor di 250 mion dòler pa su empresa telecom Bezeq.
