Palestinonan ta karga restu mortal di ser kerí ku a keda tirá riba kaminda pa un sentro di distribushon di kuminda.
GAZA, Palestina (AFP).- Krus Kòrá a konfirmá ku ayera 27 persona mas ku a bai tuma kuminda na un sentro humanitario den zùit di Gaza, a bira víktimanan di ehérsito israelí. Segun Israel, su ehérsito a tira riba “sospechosonan” ku tabata avansá den direkshon di su sòldánan.
Sekretario general di Nashonnan Uní, Antonio Guterres, a kondená e morto”inaseptabel” di palestinonan ku ta buska alimento den Gaza, apénas dos dia despues di un tragedia similar na e mesun sitio, den kua 31 persona a muri i 176 a resultá heridá.
E Alto Komisionado di Nashonalnan Uní pa Derechinan Humano, Volker Turk, a kalifiká e atakenan komo “krímennan di guera”.
E hospital di Komité Internashonal di Krus Kòrá (CICF) den Rafah, den zùit dje teritorio, “a risibí un kantidat di 184 pashènt; 19 di nan a keda deklará morto na yegada i otro ocho a muri poko despues debí na nan heridanan”, segun CICR a bisa den un komunikado.
“E mayoria dje pashèntnan tabatin heridanan di bala”, segun CICR a agregá.
Segun bosero di Defensa Sivil di Gaza, Mahmud Basal, “forsanan di okupashon israelí a kuminsá tira ku yudansa di tankinan i ‘drones’ kontra di míles di sivil kendenan a reuní den e zona di Al Alam, den Rafah.
Ademas dje tirunan di ayera den e área, trahadónan di reskate a reportá ku otro 19 palestino a muri pa atakenan israelí den otro zonanan di Gaza. Di su parti, ehérsito israelí a anunsiá morto di tres sòldá den nort di Gaza.
Investigashon riba e suseso
E general israelí Efie Difrin, bosero di ehérsito dje pais, a deklará ku “e sòldánan a lòs tirunan di atvertensia kontra di sospechosonan ku tabata aserká nan di un manera ku ta pone nan bida na peliger”.
Di su parti, White House a bisa ku nan ta investigando pa sa kiko presis a pasa.
E sitio kaminda a tragedia a tuma lugá ta situá na un kilometer for di un sentro di yudansa kaminda ku palestinonan ta bai tuma kuminda.
