JERUZALEM (AFP).- Israel a nenga di a ataká e hospital Kamal Adwan, den nort di Gaza, bisando ku e atakenan tabata djis serka dje sentro, despues ku trahadónan di reskate a akusá ehérsito israelí.
Segun ehérsito israelí, kontrario na loke a keda informá den último dianan nan no a ataká e hospital en kuestion ni a realisá operashon parti paden dje hospital, segun nan ta bisa den un komunikado.
E ehérsito mas aleu ta trese dilanti ku su “akshonnan anti terorista den e region di Jabaliya, ta inkluí áreanan djis serka dje hospital Kamal Adwan. E komunikado a keda publiká despues ku e agensia sivil di Gaza a anunsiá di por lo ménos 29 persona ku a pèrdè nan bida djabièrnè den e bombardeonan israelí serka dje hospital, un dje pokonan ku ainda ta aktivo den parti nort dje teritorio.
E direktor dje hospital, Hosam Abu Safieh, a trese dilanti ku e sentro tabata blanku di vários bombardeo djabièrnè. ”Tabatin un seri di atakenan aéreo na e partinan nort i west dje hospital, kompañá di kandela intenso” ,segun Safieh, kende a agregá ku kuater miembro dje personal a muri i ku ya no tin mas siruhano den e hospital.
Mahmud Basal, bosefo di defensa sivil di Gaza, a informá ayera ku ehérsito israelí a drenta e hospital, evakuá pashèntnan i a arestá vários palestino.
E siudat Beit Lahia ta esenario di un operashon militar israelí intenso durante e último dos lunanan, situashon ku a intensifiká den último dianan,obligando pa míles di persona hui pa motibu dje bombardeo.
Ehérsito israelí a drenta e hospital Kamal Adwan na vários okashon for di despues ku e guera a kuminsá kasi 14 luna pasá.
