MILAN, AP.- Minister di Finansa na Italia, Pier Carlo Padoan, a informá djamars ku e proyekto pa restrukturá banko Monte dei Paschi de Siena lo proveé “un futuro viabel” pa e institushon ku a wòrdu reskatá tres biaha kaba.
E deklarashonnan a tuma lugá despues ku Komishon Europeo a aprobá e plannan di Italia di invertí 5.400 mion euro den e banko mas antiguo na mundu komo parti di un proyekto di reskate di atministrashon di e institushon finansiero.
E sistema bankario italiano a wòrdu destabilisá pa un karga pisa di préstamonan inkobrabel generá pa un krísis prolongá den e terser ekonomia mas grandi di Europa, ademas di problemanan atministrativo.
Huntu ku e reskate di Monte dei Paschi, Padoan a kuminsá un plan pa salba bankonan korporativo den e region na nort di Veneto, kaminda spardónan a pèrdè miónes di euro.
E Komishon Europeo a outorisá inyekshon di plaka den Monte dei Paschi despues di aportashon di 4.300 mion euro di akshonistanan i akreedornan di baño, manera normanan di UE ta eksihí.
Manera e operashon wòrdu kompletá, e Gobièrnu italiano lo tin un partisipashon di 70% den e banko.
“E reskate ta sumamente importante pa e banko i e sistema bankario italiano. Esaki ta un plan ku ta proveé un futuro sustentabel pa e banko”, segun indikashon di Padoan den un konferensia di prensa.
