NA BORDO DI OCEAN VIKING, AP.- Un boto di reskate humanitario ku 82 migrante na bordo a haña outorisashon pa ankra na sùit di Italia, pero e minister di Eksterior italiano a atvertí ku esaki no ta un señal ku e gobièrnu ta suavisando su normanan antiinmigrashon.
E tripulashon di e boto Ocean Viking a bisa ku outoridat italiano a duna instrukshon pa e boto nabegá na e isla italiano Lampedusa.
E boto tin vários dia ta pidi pèrmit pa ankra na un puerto safe, i e boto ta wòrdu operá pa e Organisashon No Gubernamental Médikonan Sin Frontera i SOS Mediterranee.
Ocean Viking a hasi su promé reskate riba 8 di sèptèmber, despues ku 50 migrante tabata biahando na bordo di un lancha manehá pa kontrabandistanan ku a sali for di Libia. E otro 34 migrantenan a keda reskatá un dia despues di Mediteráneo. Entre e migrantenan tin un mucha hòmber somalí di un aña di edat.
E migrantenan a aploudí ku alegria i emoshon.
E gobièrnu italiano a prohibí botonan di reskate humanitario pa ankra den teritorio di Italia i laga e migrantenan baha na kosta di e pais.
