ROMA, ITALIA, AFP.- Italia a reportá mas di 10.000 kaso nobo di COVID-19 den 24 ora, konfirmando ku e kasonan ta sigui subi apesar ku gobièrnu a dekretá un serie di restrikshon i medida.
Ademas, e gobièrnu a kuminsá hasi mas tantu tèst, realisando mas di 150.000 den 24 ora.
Italia ta e promé pais afektá pa e pandemia, i a registrá 391.000 kaso inkluyendo 36.427 morto kousá pa COVID.
E regionnan mas afektá ta Lombardia, Campania i Piamonte. E gobièrnu di Guiseppe Conte a aprobá un serie di medida pa para e infekshonnan.
E kantidat di invitado na kas ta limitá na seis persona, tur fiesta privá ta keda prohibí i barnan i restorantnan lo kuminsá operá bou di orarionan mas rígido.
Seremonianan di kasamentu i boutiso ta limitá na 30 invitado, i uso di masker den espasionan será òf liber ta obligatorio den e pais kompleto.
E gobièrnu kier evitá di dekretá un lockdown den e pais kompleto debí na e konsekuensianan ku esaki lo tin pa e ekonomia, kual ya a keda afektá.