ROMA, Italia (AFP).- Italia lo prohibí e uso di burka i di niqab (e velo islámiko integral) den skolnan i lo limitá e kantidat di studiante strañero pa klas, segun e promé minister ultraderecha, Giorgia Meloni. E pais aki den zùit di Europa ta un dje portanan di entrada di migrantenan pa drenta Union Europeo, i e integrashon di strañeronan ta un dje temanan sentral di kampaña pa elekshon general di otro aña.
“Lo presentá un medida den un seshon di Konseho di ministernan pa establesé legalmente un kantidat máksimo di studiante strañero pa klas”, segun Meloni durante un reunion di hóbennan di su partido, “Rumannan di Italia”.
E promé minister a agregá ku e disposishon aki ta evaluando e prohibishon di burka i di niqab den klasnan.
E partido di derecha ekstremo Futuro Nashonal (FN) den luna di yüni último a pidi pa tuma medidanan mas fuerte kontra di uso di burka den skolnan. E partido aki, te hasta mas na derecha kompará ku e partido di Meloni, no ta forma parti di koalishon di gobièrnu i for di despues di su lansamentu den febrüari a bin ta subi ku hopi forsa den enkuestanan i ta representá un desafio pa e promé minister.
Na Italia no tin un lei ku ta prohibí e uso di burka, ni den skol i tampoko den sitionan públiko, pero un lei di 1975 ta sanshoná e uso “sin hustifikashon” di hèlm òf prendanan ku ta stroba identifikashon di un persona.
Den 2008, e tribunal atministrativo mas haltu di Italia a klasifiká ku pa motibunan religioso òf kultural por usa e belonan, pero ku e kondishon ku por mustra kara dje persona na e momento ku ta nesesario pa verifiká identidat.
For di 2010, e kantidat di studiantenan strañero ta keda limitá na 30% di un klas i di un sentro eskolar.
