CASAMICCIOLA TERME, ITALIA, AFP.- E gobièrnu italiano a dekretá un estado di emergensia riba isla di Ischia, dilanti di kostanan di Napoles, un dia despues di un desplasamentu di tera ku a kousa por lo ménos shete morto i desénas di persona pèrdí.
“E konteo di víktimanan kousá pa e desplasamentu di tera na Casamiccioa a subi na shete morto i sinku persona pèrdí”, segun indikashon di e delegado di gobièrnu di Napoles, Claudio Palomba.
Gobièrnu a pone dos mion euro disponibel, despues di un reunion ekstraordinario ku e gabinete, kual ta nesesario pa deklará e estado di emergensia segun indikashon di e Minister di Protekshon Sivil, Nello Musumeci.
Mayoria biaha Italia ta dekretá un estado di emergensia despues di temblornan, erupshonnan di volkan òf áwaseru fuerte, pa motibu ku esaki ta aselerá e proseso pa mobilisá fondonan i rekursonan.
Mas ku 200 miembro di protekshon sivil i forsanan di seguridat ta buskando desénas di persona pèrdí. Sentenáres di voluntario, ku lodo te na rudia a partisipá den labornan di limpiesa.
