WILLEMSTAD.- Ysidro Moreno Academy Top Team Curaçao ta selebrá un tremendo aktuashon di Jaime Francisco durante kampionato internashonal. Esaki ora e atleta di Kòrsou a gana e medaya di bròns durante e prestigioso IBJJF World Master Jiu-Jitsu Championship 2025, ku a tuma lugá na Las Vegas Convention Center di 28 pa 30 di ougùstùs. Despues di tres luna intensivo di preparashon tékniko, táktiko i físiko, Francisco a kaba komo di tres di mundu den su kategoria.
E atleta YDK a demostrá perseveransia i disiplina i a konfirmá ku Kòrsou ta sigui krese di Kòrsou den Jiu-Jitsu. Pa Jaime Francisco esaki ta su di dos medaya internashonal den 2025, posishonando e komo un di e lidernan den su kategoria.
E entrenadó prinsipal, Profesor Ysidro Moreno, fundadó di Ysidro Moreno Top Team Curaçao, a enfatisá e importansia di e resultado akí. “E medaya akí ta resultado di trabou duru, dedikashon i ta mustra ku atletanan di Kòrsou por kompetí na e nivel internashonal”, profesor Moreno a bisa.
