Un bista aéreo dje destrukshon okashoná pa orkan Melissa den e área di Lewis Town na Jamaica
WASHINGTON, USA (AFP).- Jamaica ta risibí un pakete di yudansa internashonal na rason di 6.700 mion dòler den tres aña despues ku orkan Melissa a kousa dañonan kalkulá na 8.800 mion dòler, segun vários banko di desaroyo a anunsiá. E isla karibense a keda gravemente afektá ku yegada dje orkan na fin di òktober i novèmber último. Melissa a keda konsiderá komo e desaster di klima di mas severo den historia dje pais, ku dañonan ekivalente na 30% dje PIB, segun e Programa di Nashonnan Uní pa Desaroyo.
E apoyo di organisashonnan manera Banko Mundial (BM), Fondo Monetario Internashonal i Banko Interamerikano di Desaroyo (BID) a tuma lugá riba solisitut dje promé minister Andrew Holness.
“E esfuerso kombiná aki ta reflehá e kompromiso unifiká pa yuda Jamaica pa por sigui un rekuperashon ku responsabilidat fiskal riba término largu”, segun e bankonan a indiká den un komunikado.
E tormenta a laga kasi 5 mion tòn di ‘afval’ ku a blòkia e kamindanan i a stroba akseso na servisionan básiko. E balansa dje orkan ta di 32 persona kende a pèrdè nan bida.
E pakete nobo ta inkluí 3.600 mion dòler di finansiamentu, di kua gran mayoria ta bini di Banko di Desaroyo di Amérika Latina i Karibe (CAF). BID i BM a entregá te ku 1.000 mion kada un.
