KRALENDIJK.– Awe a dal un paso importante pa ofresé muchanan na Boneiru mas i mihó espasio pa rekreá. Den e parke di rekreashon di Nieuw Amsterdam, ku aktualmente ta den konstrukshon, Jantje Beton, Ministerio di Salubridat, Bienestar i Deporte (VWS) i Entidat Públiko Boneiru (OLB) a firma e Akuerdo pa Rekreá Boneiru 2025-2027 (“Speelakkoord Bonaire 2025-2027”).
E akuerdo akí ta enfoká riba realisashon di espasionan pa rekreá seif, desafiante i aksesibel, pa asina kada mucha na Boneiru por desaroyá su mes físikamente, sosialmente i emoshonalmente den un ambiente di bida saludabel. Nina den Heyer, diputado di Komunidat i Kuido Boneiru, Vincent Karremans, Sekretario di Estado di Hubentut, Prevenshon i Deporte di VWS, i Mascha van Werven, direktor-gerente di Jantje Beton a firma e Akuerdo pa Rekreashon. E momento simbóliko akí a tuma lugá na e parke di rekreashon di Nieuw Amsterdam, ku pronto ta habri su portanan.
