JD VANCE; vise presidente di Merka
WASHINGTON (AFP).- Vise presidente di Merka, JD Vance, ayera a duna di konosé ku e kòmbersashonnan ku Iran ta mustra di tin bon progreso, pero Washington ta “kla i prepará” pa reanudá e operashonnan militar kontra di Iran, si no yega na un akuerdo. E komentarionan di Vance a tuma lugá algun ora despues ku e presidente Donald Trump a bisa di tabata kla pa reanudá e operashonnan militar kontra di Iran i ku el a bisa Tehran ku tin “dos pa tres dia” pa yega na un akuerdo.
“Ta logrando un bon progreso, pero nos ta ban sigui traha riba e asuntu aki i, na final, sea ta yega na un akuerdo òf nò”, Vance a bisa den konferensia di prensa na White House.
Vance, kende den aprel a enkabesá un delegashon di Merka na Pakistan pa mantené kòmbersashonnan ku no a logra yega na un akuerdo, a bisa ku Iran mester aseptá ku e no por tin armanan nuklear. “Nos ta riba un bon punto aki, pero tin opshon B, i opshon B ta ku nos por start bèk ku e kampaña militar”, di akuerdo ku e vise presidente di Merka. “Nos ta kla i prepará. Nos no ke subi e kaminda ei, pero e presidente ta dispuesto i den kondishon pa sigui e kaminda ei si ta esei nos tin ku hasi”, di akuerdo ku Vance.
