KRALENDIJK – Jessica Collins ya no ta riba e isla aki. Collins ta e turista ku algun luna pasá tabatin Boneiru den su gara na momentu ku el a orkestrá su propio desaparishon. Despues di dianan di búskeda durante kua komunidat a teme pa bida di e dama aki, el a aparesé. Collins a entregá petishon pa asilo polítiko i Servisio di Inmigrashon i Naturalisashon Hulanda Karibense (IND) a disidí ku e no ta haña asilo aki na Boneiru. Konsekuentemente el a apelá e desishon na Korte di Hustisia pero esaki tampoko no a resultá. Segun informashon Collins no tabatin niun prueba di identidat. Mientrastantu a deportá Collins pa Estádos Unídos. Hopi publisidat Collins su situashon a bini amplio den publisidat. Durante e desaparishon di Collins a bin dilanti ku ta trata di mesun muhé merikano ku a entamá un kaso kontra gobièrnu di Merka. Esaki tin di aber ku e eskándalo grandi konserní e hòmber Jeffrey Epstein. Na Boneiru, riba medio sosial públikamente el a ataká i kritiká e manera ku outoridat i gobernantenan ta funshoná. Tambe el a publiká korespondensia entre su abogado i su persona. Mientrastantu Collins a kita nan for di e plataforma aki. Awor riba un otro kuenta di e mesun plataforma di medio sosial por nota un biá mas mensahe peturbante konserní Collins. Ta splika ku un hòmber a maltratá Collins i apesar ku el a hasi denunsia, outoridatnan no a hasi nada ku e kaso. Den mesun rosea ta bisa ku Boneiru ta peligroso i ta deskonsehá pa bin e isla aki.
