ATLANTA, MERKA (AFP).- Jimmy Carter a asistí na e último homenahe na Atlanta di su kasá i èks-promé dama di Merka Rosalynn Carter, kende a fayesé siman pasá na edat di 96 aña.

E èks-presidente, di 99 aña, a yega e misa Glenn Memorial den ròlstul, den un di su poko aparishonnan públiko  den último añanan.

E tabata sintá den e promé fila huntu ku presidente di Merka, Joe Biden, e èks-presidente Bill Clinton i e sinku promé damanan di Merka ku ta na bida, kualnan ta Jill Biden, Laura Bush, Hillary Clinton, Michelle Obama i Melania Trump, komo tambe su 11 ñetu i 14 bisañetunan.

Rosalynn a muri dia 19 di novèmber na su kas na Plains, Georgia.  Jimmy i Rosalynn Carter a kasa den 1946 i a forma un pareha inseparabel,  tantu den esfera públiko komo den privá.

Rosalynn tabata envolví den kampañanan i karera polítiko di su kasá, inkluso partisipando den reunionnan di gabinete i seshonnan informativo klave tempu ku su kasa tabata presidente entre 1977 i 1981, segun ta bisa riba wèpsait di White House.

E despedida di Rosalynn a kuminsá djaluna ora ku èks i aktual agentenan di Servisio Sekreto di Merka ku ta protehá famianan presidensial, a eskoltá e kaha te na Biblioteka i Museo Presidensial Jimmy Carter na Atlanta.

LAGA UN KOMENTARIO

Please enter your comment!
Please enter your name here