Un dje dirigentenan opositor venezolano, Juan Pablo Guanipa, ta saludá sostenedónan pafó dje basílika “Virgen de la Chinita” na Maracaibo, despues di a rekobrá s libertat.
MARACAIBO, Venezuela (AFP).- E dirigente opositor Juan Pablo Guanipa ayera a bolbe hasi petishon pa elekshon na Venezuela den su promé aparishon públiko despues di a risibí su libertat. El a haña esaki danki na un lei di amnistia ku resien a keda aprobá.
Guanipa tabata visepresidente di Parlamento i hopi yegá na e lider opositor Maria Corina Machado. E tabata detené durante di nuebe luna akusá di konspirashon i apénas algun ora despues ku el a sali for di prizòn dia 8 di febrüari último, el a bolbe keda detené pa motibu ku supuestamente el a violá e libertat kondishonal na momento ku el a boga pa elekshon nobo.
Te ku ayera mardugá e tabata den ‘huisarrest’ na su kas na Maracaibo. “Laga nos tur ban lucha pa e loke a kuminsá aki por bira e realidat i ku nos tin demokrasia, libertat pa tur hende…biba Venezuela liber”, segun el a bisa na su simpatisantenan dilanti e basílika dje siudat.
Parlamento venezolano djaweps a aprobá di forma unánime un amnistia ku mester habri kaminda pa liberashon masivo di prezunan polítiko, ounke e propio Guanipa a atvertí di su limitashonnan, ku ta ekskluí otro sentenar di detenido.
E lei a keda promové pa Rodriguez, kende a heredá poder despues dje kaptura di Nicolás Maduro dia 3 di yanüari.
