Rafael Gamez Salas, “El Turko”
WASHINGTON (AFP).- Merka ayera a anunsiá e aresto ku intenshon di ekstradishon dje venezolano Rafael Enrique Gamez Salas (40), dje organisashon kriminal “Tren de Aragua”. Gamez Salas, alias “El Turko”, ya a kumpli un kondena na Merka pa a drenta e pais di forma ilegal aña pasá.
Den términonan legal, e aresto di “El Turko” ta nifiká ku el a keda transferí pa un hues ku awor lo analisá e demanda di ekstradishon formulá na Merka di parti di Chile. Den kaso ku esaki keda outorisá, Gamez Salas por keda mandá pa Chile sin kumpli ku su kondena kompleto na California, den kaso ku gobièrnu disidí esei.
E kabesante aki di “Los Piratas” supuestamente a tuma parti den e sekuestro, tortura i asesinato dje teniente retirá venezolano Ronald Ojeda den 2024. E asesinato dje eksiliado aki i disidente a kousa tenshonnan diplomátiko entre Santiago i Caracas.
“El Turko” tabata man drechi di Carlos Gómez Moreno, “Carlos Bobby”, e hefe pa den hinter Amérika Latino di Tren de Aragua, un organisashon hopi violento ku a surgi na Venezuela i a keda designá di parti di Washington komo organisashon terorista.
Chile ta akus’é di a tira kontra di un agente polisial den luna di aprel di 2024, komo tambe kasonan di sekuestro i ekstorshon, segun Deparamento di Hustisia.
