WILLEMSTAD.- Den anochi di djasabra pa djadumingu, kachónan di mondi a masakrá 4 abestrus i tambe a laga vários di nan lástima. Tabata un situashon hopi tristu pa tuma nota di loke a pasa. E 4 abestrusnan aki ta forma parti di e grupo di abestrus ku a wòrdu importá for di afó. E loke ku a tuma lugá ta sumamente lamentabel. Gerensia di “Ostrich Farm” ta hasi un supliká na tur persona ku tin kachó pa tene esakinan den kurá, i tambe e ta pidi pa e instansianan konserní atendé ku e problemátika ku tin di kachónan riba kaya. Di banda di gerensia nan ta purba pa tuma tur medida di prekoushon posibel dor di mantené nan propiedat será, pero lamentablemente e kachónan aki di un òf otro forma ta haña nan kaminda pa tòg subi riba e tereno. Ayera esaki tabatin resultado fatal pa 4 abestrus.
