Pa fundashon ManUniko
Den nos programa di Djasabra e siman akí nos a papia ku dos representantenan di Fundashon ManUniko: Achanti Damice i Angelina Comenencia Quarton. Aparte di ta forma parti aktivo di e fundashon, Angelina tin un eksperensia di 38 aña komo trahadó sosial. Tambe e ta traha pa diferente organisashon. Aktualmente, e ta duna un man na skol tambe. Achanti, na su banda, ta un sikólogo ku a studia na Universidat di Leiden. Ku mas di 10 aña di eksperensia, e ta ehersé su profeshon den diferente instansia.
Fundashon ManUniko
Fundashon ManUniko ta un proyekto ku a keda fundá na aña 2025. Su nòmber ta bisa tur kos: E ta úniko, bo mannan ta úniko i bo por krea kosnan úniko. Ta inspirante di mira kon e fundashon ta traha pa engrandesé nos komunidat na Kòrsou, spesialmente den nos grupo di hóben. Fundashon ManUniko ta derivá for di Fundashon Funditut, un organisashon ku tabata eksistí pa 36 aña, te ku aña pasá. E idea di Fundashon Funditut a nase for di JCC, un organisashon ku ta dirigí riba patfenderei. E fundadónan a ripará ku JCC tabata enfoká riba hóbennan ku ta positivo, lagando e hóbennan ku tin mas barera atras. Pa e motibu ei, a establesé Fundashon Funditut. Un gran gratitut ta bai pa Otti, un pionero den e formashon di e fundashon. Tambe mester duna honor i mérito na Sandra Daniels, ku a hasi e petishon pa kontinuá ku e metanan di Fundashon Funditut.
Dirigí riba hóbennan
E meta prinsipal di Fundashon Funditut tabata pa siña nos hóbennan entre 16 pa 24 aña ku a kai den man di hustisia e trabou di fishi. Nos sa ku ora bo kai den man di hustisia, ta bira hopi difísil pa risibí un segunda oportunidat. Ademas, e fundashon tabata enfoká riba hóbennan ku no por funshoná den e sistema di skol. Tin hopi di nos hóbennan ku no ta kaba skol básiko i skol avansá. E faktor ku ta kontribuí na esaki ta hopi diverso, manera situashon finansiero i sosial. Pa motibunan no menshoná, Fundashon Funditut a disidí ku aña pasá tabata nan último aña. Pero Achanti i Angeline a bisa ku nan sí ta kontinuá ku e bon trabou ku e fundashon a bin ta engrandesé. Bou di un otro nòmber pero ku e mesun mishon i vishon, nan ta bai mas leu ainda dor envolví e famia di e hóben hopi mas tantu.
Famia tambe ta envolví
Angeline ta agregá ku e motibu ku nan ta enbolbí e famia ta pasó nan a konstatá ku si bo yuda e hóben pero bo no involukrá e famia, e hóben ta bolbe bai den su sírkulo. Un hóben ta bin for di un kas i ta masha importante pa e kas mes tambe yuda sostené, pa asina e hóben por logra bai dilanti. Ora hasi un palabrashon ku e hóben, Angeline ke e mayor ta na altura, pa asina e mayor sa kiko e mester hasi, pa hala e hóben su atenshon den e momentu ku ta nesesario. Por ehèmpel, si e hóben mester bai traha 8or pero su mayor no ta na altura, e no por lanta e yu. Si e yu ta biba den kas ku su mayor, e mayor mester sa ki ora su yu a sali for di kas. I si tin algun problema, ta mas fásil pa e fundashon tuma kontakto ku e mayor, pa asina e interkambio di informashon bai mas bon. Di e manera akí, fundashon ta guia i desaroyá e hóben i su famia, pa den futuro tur dos por kana den un bon direkshon i pa asina e yu por krea su mes stabilidat.
Problema sosial den komunidat
Achanti ta sigui splika ku tin asina tantu problema sosial den nos komunidat, ku ta difísil pa un hóben ku a sali for di skol avansá por sigui desaroyá. Mirando ku tin hopi komersiante ku ke yuda nos hóbennan, Fundashon ManUniko ta guia é hóben den e reto ku nan ta enfrentá. E fundashon ta siña nan e abilidat sosial manera kon pa komuniká, kon pa traha den grupo i e etikanan di trabou ku ta importante. E hóbennan ta siña ku den bida laboral, bo no por kana drenta trabou ora ku bo mes ke, si no ku bo mester sa kon pa sigui instrukshon i ta prepará pa e mundu. Aparte di esaki, ManUniko ta guia e hóbennan kon pa manehá nan sèn di un manera responsabel. Tur guia ta basá riba nesesidat individual pasobra, tin hóben ku ta siña mas lihé ku otro i e fundashon ta tene esaki na kuenta. Achanti a menshoná un frase balioso: “Nos no por bisa nos ta tuma mesun akshon pa kada un. Pero kada un hóben ta importante.”
Tin ora bo mester para ketu i pensa: loke ta normal pa abo, no ta normal pa un otro hende. Den e sentido akí, si bo nota ku un persona no ta kuida su mes òf ta hasi sierto kos, aserk’é i hala su atenshon riba e puntonan akí. Por ehèmpel, tin hopi hóben ku no ta kuida nan higiena, nan djentenan no ta nechi, nan no ta tene relashon di un manera saludabel. Tin bia e hóben ta den un relashon ku un pareha ku ya tin 2 òf 3 yu i nan ta bisa ku nan no tin sèn, ku tur a kaba riba pampers. Asina bo ta haña ku e hóben ta bai kuida yu di otro hende, no pa motibunan finansiero, si no pa haña un pida amor. Ta importante pa siña e hóbennan kiko ta amor propio. Promé ku bo por duna amor na un otro, bo mester stima i kuida bo mes.
Mínimo di 6 luna bou di guia
Angeline ta bisa ku e durashon di un hóben den e proyekto ta varia. E meta prinsipal ta pa e hóben keda mínimo 6 luna den e programa. E fundashon ke duna mas tantu hóben posibel e oportunidat pa haña un segunda oportunidat. Den e kantidat di tempu ku nos tin i ku e fondonan disponibel, nos ta traha pa buta mas tantu hóben riba un bon kaminda. Nos ta enkurashá tur hóben ku a kai for di sistema di skol i no tin nada di hasi pa bin buska nan talento i laga Fundashon ManUniko yuda bo struktura bo futuro pa ku bo por logra un mañan briante.
Un trayekto adaptá na kada hóben
Si den e 6 lunanan nos no logra e progreso ku ta nesesario, nos por alargá e durashon òf rekomendá bo na otro instansia ku lo kontinuá ku e trabou. Pa esnan ku si a logra den 6 luna, e fundashon ta purba hinka nan den área di labor. Angeline ta bisa ku ora manda e hóbennan den trabou, e fundashon ta sigui guianan. Nos ta bishitá nan na trabou i na kas pa wak si nan ta kumpli ku e akuerdo ku nan a firma ku e kompania. Loke ta importante pa menshoná ta ku nos ta splika na e doñonan di trabou kua tipo di hóben nan ta risibí. No ta tur hóben por haña informashon mesun manera. Algun hende mester un splikashon mas trankil pa nan por komprendé bon. Meskos pa e hóbennan, nos ta siña nan ku den bida bo no por kore bai kada bes ku algu no ta bai manera bo ke. Mester enfrentá difikultatnan i siña kon ta responsabel tantu den trabou komo bida personal.
Dos posibilidat: trabou òf skol
Angeline ta konta ku di eksperensia a yega di pasa ku hóben ku a yega na e fundashon a bai skol bèk. Esaki ta un di e kosnan mas bunita pa mira. Si nos ta nota ku e hóben tin potensial pa kaba su estudio, e fundashon ta apoy’é den e desishon. Angeline ta bisa kla: “Nos ke duna e hóbennan e mihó chèns pa yega na e futuro ku nan meresé!”
Kon Fundashon ManUniko ta yega na hóbennan?
Achanti ta indiká ku tin diferente manera pa e fundashon yega na hóbennan. Mayoria di e biaha, ta e trahadónan sosial di skolnan ta rekomendá hóbennan na e fundashon. Pero no ta e úniko manera. Eks-hobennan ku a pasa dor di e programa ta rekomendá nan amigunan, primunan òf bisiñanan. Tambe, promoshon riba medianan sosial ta yuda e fundashon pa drenta den kontakto ku mas hóben. Tin e kaso tambe ku tin hóben ku ta sali for di prizòn i bin buska yudansa na e fundashon.
Un preparashon pa un futuro sin diploma
Hopi komersiante no ta wak si e hóben tin diploma, si no si e tin abilidat pa traha. P’esei, Fundashon ManUniko ta entrená e hóbennan riba diferente áreanan di trabou. Asina, si un kontratista bin buska un hóben pa yuda, e ta haña hóben ku a desaroyá diferente abilidat i ku ta kla pa traha.
Un grupo chikí, un impakto grandi
Aktualmente, e enfoke ta riba un grupo chikí, pa e fundashon por duna guia mas personalisá i siña e hóbennan tur loke nan mester pa logra éksito. Awor akí, tin 10 hóben na Landhuis Pannekoek (Banda Bou) i 10 hóben na Kwartier ku ta den e programa, trahando riba nan futuro.
Fondo
Un danki ta bai na e fondonan Samenwerkendefonds, Oranjefonds i Kinderpostzegels ku ta brinda e oportunidat pa yuda nos hóbennan di Kòrsou riba un bon kaminda. Ku e sosten akí, Fundashon ManUniko ta sigui traha pa duna un futuro mihó na nos hóben.
Si bo ta un mayor i bo ke yuda bo yu den su desaroyo,òf si bo ta un hóben ku mester di yudansa, tuma kontakto ku ManUniko!
Email: manunikocur@gmail.com
Whatsapp òf bel: 515-1113
Facebook: Fundashon ManUniko
Fundashon ManUniko ta warda bo ku man habrí!
Djasabra ta deseá Fundashon ManUniko hopi éksito i ta spera ku e trabou ku nan ta hasi por yuda nos komunidat enfrentá e retonan di nos hóbennan. Nos ta konfiá ku tur hóben ku ta den nesesidat lo buska e yudansa korekto. No mester tin bèrgwensa! Tin diferente manera pa logra bo meta i haña un trabou. Djasabra ta sera ku un bon konseho: “Tur problema tin un solushon.”
