WILLEMSTAD.- ABVO a tuma nota ku últimamente a bolbe lanta kabes e idea di gobièrnu pa eksigí sèn for di Kadaster pa kubri burakunan den su presupuesto. Gobièrnu no ta teniendo kuenta ku for di aña 2001 el a saka e personal di Kadaster i Hypotheekkantoor for di riba su ‘payroll’, pa asina kumpli ku eksigensianan di IMF pa baha gastunan di personal.
Ku esaki e personal di Kadaster i Hypotheekkantoor a pèrdè status di ámtenar i mester wak kon nan mes por kubri salario i gastunan di e trabou. Konhuntamente e personal a logra bou di liderato di e direktor pa traha un fundashon i sigui kumpli ku e tarea importante den ekonomia di propiedat inmóbil pa nos pais.
Pa aña, Kadaster ta yuda sòru pa invershonnan astronómiko di alrededor di 1.500.000 florin por sirkulá den e sektor di propiedat inmóbil na Kòrsou. Esaki ta bini for di tantu invershonistanan lokal komo di eksterior. Invershonistanan ta kumpra propiedat na Kòrsou pasombra nan por konta ku un bon struktura legal pues nan invershon ta sigur. Si no por garantisá esaki invershonistanan lo no bin invertí akinan fásil mas.
Bankonan tambe ta duna un fiansa den forma di hipotek na invershonistanan i Kadaster ta hunga un ròl importante den e proseso aki. Si e plan di gobièrnu resultá, esaki lo krea un problema mas grandi pa nos ekonomia. Kadaster aktualmente ta kumpliendo ku su tareanan konforme lei i ta depositando primanan tur luna di alrededor di 100.000 florin riba kuenta di gobièrnu. Si e no tin sèn e no por kumpli ku e pagonan aki.
For di aña 2011 e sistema di tarifa di Kadaster no ta sufisiente pa kubri tur e gastunan. Ta lokual ku ta krea na interes riba e depósitonan ta yuda kubri e gastunan. Tambe Kadaster a drai algun proyekto pa gobièrnu pa por risibí mas entrada.
Segun sifranan ta mustra Kadaster lo sera aña 2020 den negativo. Si no ta pa invershonnan grandi ku a tuma lugá den aña 2020 pa Klesch por establesé aki na Kòrsou i lokual ku Kadaster a risibí di interesnan, sifranan lo tabata hopi mas malu ainda.
Aktualmente Kadaster ta den e proseso pa wak kon por risibí su plakanan ku e tin pegá den Girobank, tambe Kadaster mester mantené un fondo pa kubri gastunan di APC pa tur e eks- ámtenarnan ku a yega di traha pa e fundashon Kadaster.
E sèn pegá na Giro i e fondo ta suma montante di miónes. Lokual ku Kadaster ta usa pa generá fondo pa kubri su défisitnan i paga su trahadónan i otro gastunan ta praktikamente lokual gobièrnu ta menasando pa kita for di e fundashon. Esaki lo trese trahadónan di Kadaster su pan direktamente na peliger i ABVO komo representante di e trahadónan di Kadaster lo no permití pa esaki tuma lugá.
