ROMA, AP.- E kadaver di un studiante merikano ku a pèrdè algun dia pasá, algu despues ku el a yega pa un programa di interkambio, a wòrdu hañá den e riu Tiber, segun konfirmashon di Universidat John Cabot.
E sentro Superior a konfirmá ku e kadaver tabata pertenesé na Beau Solomon, di 19 aña i prosedente di Wisconsin, kende a wòrdu mirá pa último biaha pa su amigunan riba djabièrnè mardugá.
“Nos mas sentido pésame ta bai na famia Solomon i tur esnan ku tabata stima Beau”, segun publikashon di un komunikado di e universidat ku sede na Roma.
Solomon a kada di terminá su promé aña di estudio di finansa na Universidat di Wisconsin- Madison. Den un komunikado anterior, e universidat a bisa ku “un alerta di parti su kompañero di kamber a drenta, kende a indiká ku el a pèrdè kontakto ku Beau alrededor di 1’or di mardugá i a keda preokupá ku Beau no a present’é na un reunion di orientashon” djabièrnè mainta.
Famia di Solomon a bisa ku su tarhetanan di krédito a keda usa despues di su desaparishon.
Famia Solomon i ta na Italia i e universidat ta den kontakto ku outoridatnan italiano, segun embahada merikano i presidente di e universidat, Franco Pavoncello. Sin sita fuente òf nòmber, e agensia di notisia italiano ANSA a bisa ku dos persona a mira un hòmber tira un otro den Tiber anochi ku Solomon a pèrdè.
