Alaa Moussa, akusá di krímennan kontra di humanidat den añanan dje diktador sirio Basar al Assad, ayera a tende sentensia di bida largu pa su persona.
FRANKFURT, Alemania (AFP).- Un dòkter sirio akusá di a torturá opositornan durante e regimen di Bashar al Asad a keda kondená na kadena perpetuo di parti di hustisia aleman despues di un kaso penal di mas ku tres aña.
Alaa Moussa, di 40 aña, a yega Alemania den 2015, kaminda el a traha komo siruhano ortopédiko, te ku su aresto den 2020. E aresto a tuma lugá despues ku refugiadonan sirio a rekonosé.
El a keda akusá di vários delito kometé kontra di detenidonan den hospitalnan militar di Damascus i Homs durante e guera sivil den Siria.
Semper el a nenga tur e akusashonnan, inkluso di a sende genitalnan di un adolesente na kandela i di a atministrá inyekshon letal na un prezu ku a resistí palisanan risibí.
“El a mata dos persona i a heridá otro nuebe gravemente”, segun e wes Christoph Koller, refiriendo na aktonan kometé den 2011 i 2012. “El a forma parti di un reakshon brutal dje régimen diktatorial inhustu di Al Asad” kontra dje protesta di opositornan.
Segun e wes ku e veredikto ta mustra ku “no ta lubidá e sufrimentu dje víktimanan”.
Alemania ya a prosesá i husga outornan di krímennan kontra di humanidat i krímennan di guera kometé pafó di su teritorio, entre nan vários sirio i irakí. E prosesonan ta den nòmber di prinsipio legal di hurisdikshon universal.
Den luna di desèmber último Al Asad a keda deroká pa un koalishon di forsanan ku a inkluí gruponan yiahidsta i a hui dje pais.
